“Ermənistanın Rusiyadakı səfiri Qurgen Arsenyanla Rusiya Xarici İşlər Nazirliyində söhbət sərt məcrada keçib”.
Busaat.az xəbər verir ki, bu barədə Rusiyanın “Russia Today” (RT) kanalı adı açıqlanmayan mənbəyə istinadən məlumat yayıb.
“Mayın 9-u ərəfəsində İrəvanda təşkil edilmiş anti-Rusiya yığıncağı və Zelenskinin Ermənistan paytaxtında bütün iştirakçıların susqun razılığı fonunda səsləndirdiyi birbaşa terror hədələri, Ermənistan rəhbərliyinin Moskvada üzərinə götürdüyü müttəfiqlik öhdəlikləri və dostluq təminatları ilə ziddiyyət təşkil edir”, – kanalın “Telegram” kanalında edilmiş paylaşımda deyilir.
Xatırladaq ki, ötən gün Ermənistanın Rusiyadakı səfiri Rusiya XİN-ə çağırılıb. Səfirə Ukrayna Prezidenti Volodimir Zelenskiyə Ermənistanda Rusiyaya qarşı terror təhdidləri etmək üçün platformanın yaradılmasının qəti şəkildə qəbuledilməz olduğu bildirilib.
