İsrail prezidenti İsaak Hersoq müxalifətin kütləvi etirazlarına səbəb olan məhkəmə islahatları ilə bağlı kompromis axtarışındadır. O, parlament partiyalarını təmsil edən danışıqların ikinci raundunu keçirib.
Busaat.az xəbər verir ki, prezident Yerusəlimdəki iqamətgahında əvvəlcə ərəb partiyası Raam-ın (120 yerlik parlamentdə 5 yer) nümayəndə heyətini qəbul edib, sonra solçu ərəbpərəst Hadaş-Taal blokunun (5 yer) nümayəndələri ilə görüşüb. Ardınca HaAvoda işçi partiyası (4 yer) ilə danışıqlar aparılıb.
Danışıqların birinci raundu bir gün əvvəl baş tutub. Burada hakim koalisiyanın və iki ən böyük müxalifət qüvvəsinin nümayəndələri iştirak ediblər: keçmiş baş nazir Yair Lapidin Yeş Atid partiyası (parlamentdə 24 yer) və keçmiş müdafiə naziri Benni Qantsın rəhbərlik etdiyi blok (12 yer) həmin danışıqlarda iştirak edib.
Görüşlər barədə geniş təfərrüatlar verilməyib.
