Liviyada sel fəlakəti səbəbindən ibtidai və orta təhsil müəssisələrində təhsil 10 gün müddətinə dayandırılıb.
Busaat.az xəbər verir ki, bu barədə ölkənin baş naziri Əbdülhəmid ed-Dibeybe məlumat yayıb.
“Fəlakətdən əziyyət çəkən şəhərlərdəki ağrılı vəziyyəti nəzərə alaraq, ölkə daxilində ibtidai və orta təhsil müəssisələrində təhsili 10 gün müddətinə dayandırmaq qərarına gəldim”, – baş nazir açıqlamasında bildirib.
Bu bölgələrdəki tələbələrin təhsilə qayıtması üçün Təhsil Nazirliyinə plan hazırlamağı tapşırdığını deyən Dibeybe təhsil üçün müvəqqəti mərkəzlərin yaradılacağını da qeyd edib.
Baş nazir əvvəlki açıqlamasında sel səbəbilə evlərini tərk edənləri yerləşdirmək üçün 700 yatağa malik gəminin Dərnə sahilinə yönəldildiyini açıqlamışdı.
Xatırladaq ki, sentyabrın 10-da Mərkəzi Aralıq dənizinə təsir edən və Liviyanın şərqini vuran “Daniel” tufanı Benqazi, Beyda, Merc, Suse və Derna şəhərlərində daşqınlara səbəb olub.
Liviya Milli Birlik Hökuməti sel fəlakətində 6 min insanın öldüyünü, minlərlə insanın itkin düşdüyünü açıqlayıb.
