“Minsk Qrupu Qarabağla bağlı yenə də rol oynaya bilər” – Çavuşoğlubackend

Türkiyə xarici işlər naziri Mövlud Çavuşoğlu 2020-ci ildə Türkiyənin xarici siyasəti barədə açıqlama verib. Busaat.az xəbər verir ki, nazir Qarabağ, Kipr, Şərqi Aralıq dənizi məsələlərinə də toxunub.

Çavuşoğlu Ermənistanın hücumlarına baxmayaraq, Azərbaycanın özünü tez və qətiyyətlə müdafiə etdiyini, işğal olunmuş ərazilərini nəzarətə götürdüyünü və münaqişənin 44 gündən sonra 9 noyabr 2020-ci il tarixli ortaq bəyannamə ilə sona çatdığını xatırladıb.

Nazir bu bəyannamənin hər şeydən əvvəl ”Dağlıq Qarabağın Azərbaycana aid olduğunu” təkrarladığını, 7 bölgəni də öz sahibinə qaytardığını, atəşkəs qurduğunu və bir milyon azərbaycanlı köçkünün evlərinə qayıtmasını nəzərdə tutduğunu bildirib:

“Birgə bəyannamə, həmçinin Minsk Qrupunun illər ərzində ortaya qoyduğu fikir və prinsipləri geniş şəkildə əks etdirir. Zəruri hallarda Minsk Qrupu yenə də rol oynaya bilər. Həmsədrlər obyektiv, konstruktiv olmalı və keçmişdəki prosesin zəif performansından dərs almalıdırlar”.

Çavuşoğlu bölgədə davamlı sülh üçün əsl bir fürsət pəncərəsinin açıldığını vurğulayıb: “Azərbaycanın dəvətinə cavab olaraq uyğunluq və yenidənqurma işləri üzərində çalışmağa davam edəcəyik. Atəşkəsə nəzarət etmək üçün Rusiya ilə ortaq mərkəz yaratdıq. Bu atəşkəs çox vacibdir və qorunmalıdır. Bundan sonra erməni tərəfi bu atəşkəsə və ortaq bəyannamədə razılaşdırılmış şərtlərə əməl edəcəkdir”.

Türkiyə XİN rəhbəri bölgədəki sabitliyin erməni xalqı və Ermənistan üçün də faydalı olacağını sözlərinə əlavə edib: “Bu səbəblə Azərbaycanın 6 ölkənin iştirakı ilə regional format təşəbbüsünü dəstəkləyirik. Bu, sülh və rifah üçün regional mülkiyyəti artıracaq”.