Biz heç vaxt Rusiyanın işğalını və saxta referendumlarını tanımayacağıq - G7

“Biz Rusiyanın torpaq ilhaqlarını və saxta referendumlarını heç vaxt tanımayacağıq”.

Busaat.az xəbər verir ki, bu barədə G7 xarici işlər nazirləri yaydıqları birgə bəyanatda Rusiyanı Ukraynadakı müharibəni dayandırmağa çağırıblar.

Kanada, Fransa, Almaniya, İtaliya, Yaponiya, Böyük Britaniya, ABŞ-dan ibarət G7 ölkələrinin xarici işlər nazirləri və Avropa İttifaqı (Aİ) Rusiyanın Ukraynadakı işğalı ilə bağlı birgə bəyanat yayıb. Ukraynanın suverenliyi və müstəqilliyini dəstəklədiklərini təkrarlayaraq, Rusiyanı müharibəni dayandırmağa çağırıblar.

Bəyanatda qeyd edilib: “Rusiyanın Ukraynaya qarşı təcavüzünü, Ukraynanın suverenliyini, ərazi bütövlüyünü və müstəqilliyini pozmağa davam etməsini ən şiddətli şəkildə qınayırıq. Prezident Putinin Donetsk, Luqansk, Xerson və Zaporojye bölgələrini Rusiya Federasiyasının ərazisinə daxil etmək səyləri qəbuledilməzdir. Biz heç vaxt Rusiyanın beynəlxalq hüququ pozmasını qəbul etməyəcək, BMT Nizamnaməsi, Helsinki Yekun Aktı və Paris Xartiyasının ümumi qəbul edilmiş prinsip və öhdəliklərinə sadiq qalaraq onun ilhaqlarını və ya silah zoru ilə keçirilən saxta referendumlarını tanımayacağıq”.

Rusiyaya və Rusiyanın beynəlxalq hüquq pozuntularına siyasi və ya iqtisadi dəstək verən Rusiya daxilində və xaricində fərd və təşkilatlara daha çox iqtisadi sanksiyaların tətbiq ediləcəyi vurğulanan bəyanatda, “Ukraynanın Rusiyanın müharibəsinə qarşı özünü müdafiə etmək və torpaqlarını geri almaq hüququ var. Biz onu dəstəkləməkdən çəkinmirik”, – deyə əlavə edilib.