Pakistanda genişmiqyaslı əməliyyat SİQNALI

Pişəvərdə məscidə intiharçı hücumundan sonra genişmiqyaslı antiterror əməliyyatı üçün milli konsensus lazımdır.

Busaat.az xəbər verir ki, bunu Pakistanın müdafiə naziri Xavaca Mohammed Asif bildirib.

Asif 2014-cü ilin dekabrında Pişəvərdə hərbi məktəbə edilən və əksəriyyəti uşaq olmaqla 150-dən çox insanın həlak olduğu hücumu xatırladıb və 2010-2017-ci illərdə terrora qarşı uğurlu əməliyyatların aparıldığını bildirib.

Terrora qarşı genişmiqyaslı əməliyyata başlamaq üçün milli konsensusa ehtiyac olduğunu ifadə edən Asif, “Terrorun toxumlarını özümüz əkdik”, – deyə bildirib.

Asif qeyd edib ki, Sovet Sosialist Respublikaları İttifaqı (SSRİ) Əfqanıstanı işğal edəndə Pakistan ABŞ-a kirayə xidmətlər təklif edib.

Pakistanın ABŞ-la yaxşı münasibətlərə malik olması lazım olduğunu bildirən Asif, “Ancaq onların əmrləri və beynəlxalq təsirləri üçün mübarizə aparmamalıyıq. Əvvəlcə ölkəmizi qaydaya salmalıyıq. Ölkəmiz qaydasında deyil”, – əlavə edib.

Qeyd edək ki, Pakistanın Hayber Paxtunxva əyalətində dünən günorta namazı zamanı məscidə hücum nəticəsində 100 nəfər ölüb, 225 nəfər yaralanıb.

Pakistan 2010-cu ildən artan terror hücumlarına görə Əfqanıstanla sərhədə yaxın ərazilərdə bir sıra hərbi əməliyyatlara başlayıb.