“PSJ”nin yeni vingeri Usman Dembele Neymarın nömrəsinə sahib çıxdı
“PSJ”nin yeni vingeri Usman Dembele yeni mövsümdə 10 nömrəli forma geyinəcək.
Busaat.az xəbər verir ki, bu barədə Paris klubunun mətbuat xidməti məlumat yayıb.
Daha əvvəl 10 rəqəmi bir müddət öncə Səudiyyə Ərəbistanının “Əl-Hilal” klubuna keçən braziliyalı Neymara məxsus idi. “Barselona”da olduğu müddətdə Dembele 7 və 11 nömrələr altında oynayıb. Neymardan başqa, müxtəlif vaxtlarda Ronaldinyo, Xavyer Pastore və Zlatan İbrahimoviç kimi futbolçular “PSJ”də 10-cu nömrə altında çıxış ediblər.
Dembele 50 milyon avroya “Barselona”dan “PSJ”yə keçib. Futbolçu parislilərlə 5 illik müqavilə imzalayıb.
2022/2023 mövsümündə fransız bütün yarışlarda mavi qranat üçün 34 oyun keçirib, səkkiz qol və doqquz məhsuldar ötürmə edib.
Transfermarkt internet portalına görə futbolçunun təxmini dəyəri 60 milyon avrodur.
