Rusiya xarici işlər nazirinin müavini Aleksandr Qruşko Finlandiyanın NATO-da iştirakına qarşı qərb və şimal-qərb istiqamətində hərbi potensialı gücləndirəcəklərini bəyan edib.
Busaat.az xəbər verir ki, Qruşko Rusiyanın Ria Novesti xəbər agentliyinə verdiyi açıqlamada Finlandiyanın NATO-ya üzvlüyünü dəyərləndirib.
Rusiyanın buna qarşı lazımi addımlar atacağını bildirən Qruşko deyib: “Qərb və şimal-qərb istiqamətində hərbi potensialımızı gücləndirəcəyik. Əgər NATO-nun digər üzvlərinə məxsus hərbi qüvvələr və maşınlar Finlandiyaya yerləşdirilərsə, biz Rusiyanın hərbi təhlükəsizliyini möhkəm şəkildə təmin etmək üçün əlavə addımlar atacağıq”.
Qeyd edək ki, 2022-ci ilin may ayında NATO-ya üzvlük üçün müraciət edən Finlandiyanın üzvlük protokollarının Türkiyə Böyük Millət Məclisinin təsdiqləməsindən sonra bütün 30 NATO ölkəsi təsdiqləmə prosesini tamamlayıb. Bundan sonra, NATO-nun baş katibi Yens Stoltenberq Finlandiyanın sabah 31-ci üzv elan ediləcəyini və bayrağının NATO-nun mənzil-qərargahında dalğalanacağını açıqlayıb.
Busaat.az
