Çinin müdafiə naziri Li Şanqfu ABŞ və Çin arasında mümkün qarşıdurmanın “dözülməz fəlakət” olacağını, lakin onun ölkəsinin münaqişədən çox dialoqa can atdığını bildirib.
Busaat.az xəbər verir ki, bu barədə Çinin müdafiə naziri Sinqapurda Şanqri-La təhlükəsizlik forumunda çıxış edib.
Li deyib ki, dünya Çin və ABŞ-nin birlikdə böyüməsi üçün kifayət qədər böyükdür.
Çin və ABŞ-nin bir çox cəhətdən fərqli olduğunu qeyd edən Li deyib: “Lakin bu, ikitərəfli münasibətləri inkişaf etdirmək və əməkdaşlığı dərinləşdirmək üçün iki tərəfin ortaq mövqe və ortaq maraqlar axtarmasına mane olmamalıdır. Çin və ABŞ arasında ciddi qarşıdurma dünya üçün dözülməz bir fəlakət olacaq”.
Li “bəzi ölkələri” silahlanma yarışını gücləndirməkdə və başqalarının daxili işlərinə qəsdən qarışmaqda ittiham edərək, ABŞ-yə vurğu edib.
“Soyuq müharibə zehniyyəti canlanır və təhlükəsizlik risklərini xeyli artırır. Qarşılıqlı hörmət tiranlıq və hegemonluqdan üstün olmalıdır”, – Li deyib.
Busaat.az
