Almaniyada Fələstinə dəstək aksiyası qadağan edildi

Almaniyanın paytaxtı Berlində keçirilməsi planlaşdırılan Fələstinlə həmrəylik mitinqinə ictimai təhlükəsizlik səbəbi ilə icazə verilməyib.

Busaat.az xəbər verir ki, bu barədə Berlin polisi məlumat yayıb.

“Berlin şəhərinin müxtəlif rayonlarında Fələstinlə həmrəylik nümayişi və eyni mövzuda yürüş, eləcə də onları əvəz edəcək bütün tədbirlər, ictimai təhlükəsizliyə və asayişə təhlükə törətdiyi əsas götürülərək qadağan edilir”, – bəyanatda deyilib.

Açıqlamada polisin məsələ ilə bağlı mitinq təşkilatçılarına məlumat verdiyi bildirilib.

Qeyd edək ki, paytaxtda “Fələstin danışır” və “Fələstin Fəaliyyət Komitəsi” kimi müxtəlif Fələstin tərəfdarları nümayişlər planlaşdırırdı.