Amerikalı jurnalistin həbs müddətinin üç ay uzadılması barədə qərar qüvvədə qalıb

Moskva Şəhər Məhkəməsi casusluqda ittiham olunan “The Wall Street Journal” qəzetinin müxbiri, ABŞ vətəndaşı Evan Qerşkoviçin həbs müddətinin üç ay uzadılması barədə qərarı qüvvədə saxlayıb.

Busaat.az xəbər verir ki, bu barədə məhkəmə məlumat yayıb.

“Məhkəmə Lefortovo məhkəməsinin Qerşkoviçin həbs müddətinin uzadılması barədə qərarından verilən apellyasiya şikayətinə baxıb və birinci instansiyanın qərarının dəyişdirilmədən, müttəhimin vəkillərinin apellyasiya şikayətinin təmin olunmadan saxlanılmasına qərar verib”, – deyə məhkəmədən bildirilib.

İşdə məxfi materiallar olduğu üçün iclas bağlı qapılar arxasında keçirilib. Bundan əvvəl jurnalistin həbs müddəti noyabrın 30-dək uzadılıb.

FSB-nin İctimaiyyətlə Əlaqələr Mərkəzinin məlumatına görə, Gerşkoviç Amerika tərəfinin göstərişi ilə hərəkət edərək, Rusiyanın hərbi sənaye kompleksindəki bir müəssisənin fəaliyyəti haqqında dövlət sirri təşkil edən məlumat toplayıb.

Gerşkoviç martın sonunda Uralın Yekaterinburq şəhərində saxlanılıb. Jurnalist Rusiya Cinayət Məcəlləsinin 276-cı maddəsi ilə casusluqda ittiham olunub. O, özünü təqsirli bilmir.