Türkiyə Prezidentinin sözçüsü İbrahim Kalın Böyük Britaniyanın Milli Təhlükəsizlik müşaviri Tim Barrou ilə telefon danışığı aparıb.
Busaat.az xəbər verir ki, bu barədə məlumat Türkiyə Prezident Aparatından verilib.
Məlumata görə, görüşdə ikitərəfli siyasi və iqtisadi əlaqələr, müdafiə sənayesi sahəsində əməkdaşlıq, Ukrayna müharibəsi, Suriya və terrorla mübarizədə son hadisələr müzakirə olunub.
Bildirilib ki, Ukrayna müharibəsinin uzanması humanitar böhranları dərinləşdirib, qlobal səviyyədə enerji, ərzaq və iqtisadi kövrəkliyi artırıb. Müharibəni bitirmək və danışıqlar masasına qayıtmaq üçün Türkiyənin diplomatik təşəbbüslərinin dəstəklənməsinin böyük əhəmiyyət kəsb etdiyi vurğulanıb. Taxıl müqaviləsinin müddətinin uzadılmasından məmnunluq ifadə edilərək, taxıl daşınmasının daha səmərəli davam etdirilməli olduğu bildirilib.
Kalın İstanbulda törədilən terror aktından sonra Suriyada həyata keçirilən əməliyyatların Türkiyənin milli təhlükəsizliyinə təhdid yaradan PKK/PYD/YPG terror təşkilatlarına qarşı yönəldiyi də bildirib. Bu kontekstdə Türkiyənin Birləşmiş Millətlər Təşkilatı Konvensiyasının 51-ci maddəsinə uyğun olaraq özünümüdafiə hüququ olduğu vurğulayıb.
İki ölkə arasında müdafiə sənayesi, o cümlədən milli döyüş təyyarəsi TFX layihəsi sahəsində əməkdaşlığın inkişaf etdirilməsi və konkret layihələrin həyata keçirilməsi razılaşdırılıb.
