Braziliyada yüksək vəzifəli məmurlara sui-qəsd planlaşdıran cinayətkar təşkilat zərərsizləşdirilib

Braziliyada yüksək rütbəli siyasətçilərə və məmurlara sui-qəsd təşkil etməyi planlaşdıran cinayətkar təşkilatın zərərsizləşdirildiyi bildirilib.

Busaat.az xəbər verir ki, Braziliya mətbuatında çıxan xəbərə görə, federal polis ölkənin 5 əyalətində eyni vaxtda böyük bir dəstəyə qarşı əməliyyat keçirib.

Ədliyyə naziri Flavio Dino “Twitter” hesabından verdiyi açıqlamada təşkilatın ev və binalarına 120 polisin basqın etdiyini qeyd edib: “Bir neçə dövlət məmurunun (o cümlədən senator və prokuror) sui-qəsd planları ələ keçirilib, bu planlar araşdırılıb. Lazımi tədbirlər görülüb”.

Sui-qəsdin hədəfləri arasında Braziliya prezidenti Luiz İnasio Lula da Silva və keçmiş ədliyyə naziri Serxio Moronun olduğu, əməliyyatın San Paulo və Parana əyalətlərində, həmçinin Rondoniyada həyata keçirilməsinin planlaşdırıldığı məlumatları paylaşılıb.

Əməliyyatın Braziliya və Cənubi Amerikada “PCC” adlı ən böyük narkotik ticarəti qrupuna qarşı aparıldığı və qrupun Paraqvay prokuroru Marselo Peççinin qətlində rolunun olduğu bildirilib.

Qeyd olunub ki, PCC-yə bağlı silahlı şəxslər keçmiş ədliyyə naziri Moronun evinin yaxınlığındakı fermanı icarəyə götürüb və uzun müddət kəşfiyyat işləri aparıblar.