Çexiya Baş Qərargahı qismən səfərbərlik elan edib

Avropada hərbi qarşıdurma baş verərsə, təkcə peşəkar ordunun qüvvələri kifayət etməyəcək, bütün cəmiyyət cəlb olunmalı və “insan və texnikanın qismən səfərbərliyi” baş tutmalı olacaq.

Busaat.az ČTK agentliyinə istinadən xəbər verir ki, bunu Çexiya Ordusu Baş Qərargah rəisi, general-mayor Karel Rehka deyib.

“Əgər biz yaxın gələcəkdə bəzi terror qrupları istisna olmaqla, böyük bir müharibədə olacağıqsa, qarşı tərəf Rusiya olacaq”, – Rehka deyib.

Onun fikrincə, əgər NATO ilə Rusiya arasında, məsələn, alyansın şərq cinahında, Çexiya ərazisindən kənarda müharibə baş versəydi, bu, dərhal Çexiyaya təsir edərdi və təkcə onun peşəkar ordusunun cəlb olunması heç bir nəticə verməzdi: “Bütün cəmiyyət cəlb olunmalı, həm insanların, həm də maddi imkanların ən azı qismən səfərbərliyi olmalıdır”.

Generalın fikrincə, Ukraynadakı münaqişə Qərb cəmiyyətinin təfəkkürünün dəyişməsinə səbəb olub və bu, Avropada müharibə ehtimalını  artırıb. NATO ölkələri, o cümlədən Çexiya hazırda öz strateji sənədlərini nəzərdən keçirir və müdafiə və təhlükəsizlik strategiyalarına düzəlişlər edir.