Ərdoğan: “Türkiyənin İsveçin NATO-ya daxil olmasını təsdiqləməsi Stokholmdan asılıdır”

İsveçin NATO-ya üzvlüyü ilə bağlı qərarı Stokholmun hərəkətlərinə nəzarət edən Türkiyə parlamenti verəcək.

Busaat.az TASS-a istinadən xəbər verir ki, bu barədə Türkiyə prezidenti Rəcəb Tayyib Ərdoğan jurnalistlərə bildirib.

“İsveçin NATO-ya üzvlük protokolunun parlamentə göndərilməsi və onun təsdiqi prosesi birbaşa İsveçin üzərinə götürdüyü öhdəlikləri yerinə yetirməsi ilə bağlıdır. Qərarı parlament verməli olacaq, komissiyalarda nə qədər müzakirə olunacaq, bu proses nə qədər çəkəcək, biz bilmirik. İsveç ilk növbədə Stokholm küçələrinə nəzarət etməlidir. Əgər İsveç hakimiyyəti bunu etməsə, müqəddəs Qurani-Kərimə hücumlar davam edərsə, o zaman bizdən inciməsinlər”, – Ərdoğan deyib.