İran İnsan Haqları Təşkilatı (İHR) Məhsa Əmininin ölümündən sonra səngiməyən nümayişlərdə təhlükəsizlik qüvvələrinin müdaxiləsi nəticəsində həyatını itirənlərin sayının 342-yə, haqlarında edam cəzası verilən məhbusların sayının isə 5-ə yüksəldiyini açıqlayıb.
Busaat.az xəbər verir ki, bu barədə Norveç mərkəzli İHR-nin saytında hesabat dərc edilib.
Hesabatda ölkədə təxminən 60 gündür davam edən nümayişlər barədə məlumat verilib.
Ölkədəki 31 əyalətdən 23-ü ilə bağlı məlumatların yer aldığı hesabatda ən çox itkilərin sünnilərin cəmləşdiyi Sistan-Bəlucistan əyalətində baş verildiyi bildirilib.
Hesabatda Sistan-Bəlucistan əyalətində 123, Tehranda 39, Mazandaranda 33, Kürdüstanda 32, Gilan və Qərbi Azərbaycanda 23, Kirmanşahda 14, Elborz, Xuzistan və Xorasanı Rezevidə 15, İsfahanda 5 və Zəncan və Loristanda hər biri 3, Qəzvin, Kohgiluye-Buyer Əhməd, Şərqi Azərbaycan , Ərdəbil, İylam, Buşehr və Həmədanda hər birində iki nəfər nümayişçinin öldüyü bildirilib.
Həyatını itirən nümayişçilərdən 43-nün 18 yaşdan kiçik, 26-nın isə qadın olduğu qeyd olunub.
Nümayişçilər arasında saxlanılanların sayının 10 mini keçdiyi, indiyədək 5 nümayişçinin edam cəzasına məhkum edildiyi bildirilib.
Qeyd edək ki, İHR Noyabrın 11-də dərc etdiyi hesabatında Əmininin ölümündən sonra başlayan nümayişlərə təhlükəsizlik qüvvələrinin müdaxiləsi nəticəsində 304 etirazçının həlak olduğunu bildirib.
Ölkədə yayılan nümayişlərdə 40-dan təhlükəsizlik əməkdaşının həyatını itirdiyi qeyd edilib.
