Kuman “Barselona” rəhbərliyini tənqid etdi

“Barselona”nın baş məşqçisi Ronald Kuman Kataloniya təmsilçisində işinə davam edib-etməyəcəyini bilmir.

Busaat.az İspaniya mətbuatına istinadən xəbər verir ki, bu barədə o, La Liqanın sonuncu turunda “Eybar”la matç öncəsi deyib. Niderlandlı mütəxəssis özünün və məşqçi heyətinin daha çox dəstəyə layiq olduğunu vurğulayıb:

“Barselona”nın hər zaman təzyiqli yer olduğunu bilirəm və bunu qəbul edirəm. Bəzən İspaniya mediası məşqçilərin gələcəyi ilə bağlı verilən qərarlara təsir edir. Bu, böyük hörmətsizlikdir. Bunun dəyişməli olduğunu düşünürəm. Çünki daha çox hörmətə layiqik”.

Çempionluq şanslarını itirən klubun baş məşqçisi rəhbərlikdən də dəstək görmədiyini söyləyib: “Rəhbərliklə gələcəyimlə bağlı danışmamışıq. Kuboklar qazanmaq üçün daha iddialı olmalıyıq. Buna görə bəzi dəyişiklik etməliyik. Rəhbərlik bunun yeni məşqçi və ya oyunçularla edilməli olduğunu düşünürsə, mənim üçün problem deyil. Ancaq bu fikir açıq şəkildə ifadə edilməlidir”.