Lavrov ilk dəfə Banqladeşə səfər edib

Rusiyanın xarici işlər naziri Sergey Lavrov çərşənbə günü Banqladeş Xalq Respublikasına ilk dəfə səfər edib.

Busaat.az xəbər verir ki, bu barədə TASS-ın müxbiri məlumat yayıb.

Onun sözlərinə görə, Rusiyanın baş diplomatını Şərqi Asiya Sammitində iştirak etdiyi İndoneziyadan aparan təyyarə Dəkkə Şahcəlal Beynəlxalq Hava Limanına enib.

Rusiya Xarici İşlər Nazirliyinin sözçüsü Mariya Zaxarova mətbuat brifinqində bildirib ki, Lavrov səfəri zamanı Banqladeşin baş naziri Şeyx Hasina və xarici işlər naziri AK Abdul Momen ilə görüşüb.

Rusiya xarici siyasət agentliyinin məlumatına görə, iki ölkənin rəsmiləri ikitərəfli münasibətləri və onun inkişaf perspektivlərini, habelə aktual regional və qlobal problemləri müzakirə edəcəklər.

Xatırladaq ki, Lavrov sonuncu dəfə Banqladeşli həmkarı ilə 2021-ci ilin iyulunda Daşkənddə keçirilən beynəlxalq konfransın kənarında görüşüb.