Nazirlik bu avtodayanacağın fəaliyyətini dayandırdı – Video

Fövqəladə Hallar Nazirliyi Nəsimi rayonu V.Plotnikov və M.Qaşqay küçələrinin kəsişməsində yerləşən avtodayanacağın fəaliyyətini dayandırıb.

Busaat.az xəbər verir ki, bu barədə FHN-nin mətbuat xidməti məlumat yayıb.

Bildirilir ki, FHN-nin Dövlət Yanğın Nəzarəti Xidməti tərəfindən qeyd olunan ünvanda inşa edilmiş yaşayış kompleksində plandankənar yoxlama zamanı yanğın təhlükəsizliyi sahəsində çoxsaylı nöqsanların mövcud olduğu ortaya çıxıb. Aşkar edilmiş nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.

Obyektin məsul şəxsləri barəsində inzibati xəta haqqında protokollar tərtib edilib və yanğının baş vermə riskinin və nəticələrinin minimuma endirilməsi məqsədilə müvafiq qanunvericiliyin tələblərini rəhbər tutaraq müraciət əsasında qeyri-yaşayış sahəsinin elektrik enerjisi təchizatı 4 fevral tarixindən dayandırılıb.