Ödəmə terminallarından 25 min oğurluq edən şəxslər saxlanılıb

Lənkəranda ödəmə terminalları və mağazalardan oğurluq edən dəstə üzvləri saxlanılıb.

DİN Mətbuat Xidmətinin Lənkəran regional qrupundan  verilən məlumata görə, martın 23-də Lənkəran rayonunun Hirkan qəsəbəsində yerləşən bir mağazadan 800 manatlıq danışıq kartları, 150 manat dəyərində tütün məmulatları, 600 manat nağd pulun, həmçinin həmin mağazada yerləşən ödəmə terminalından 1910 manat pul oğurlanıb.

Lənkəran ŞRPŞ-nin əməkdaşları tərəfindən oğurluğu törətməkdə şübhəli bilinən Astara rayon sakinləri Səadət Mirzəyev, Peyman Məstəliyev, Ramiz Cəbiyev, və Zabir Hüseynzadə saxlanılıblar və törətdikləri əməli etiraf ediblər.

Onların ətrafında aparılan əməliyyat tədbirləri ilə saxlanılan şəxslərin Astara rayonu ərazisindəki 1 “Kapital Bank” və 1 “MilliÖn” ödəmə terminalından və 2 mağazadan ümumilikdə 22099 manat nağd pul, 1300 manat dəyərində isə tütün məmulatları oğurladıqları da müəyyən edilib.

Oğurlanmış pul və danışıq kartları onlardan aşkarlanaraq maddi sübut kimi götürülüb. Faktlarla bağlı araşdırma aparılır.