Pakistanda İmran Xanın tərəfdarları ilə polis toqquşub: 8 nəfər yaralanıb

Pakistanın keçmiş baş naziri İmran Xanı həbs etmək üçün evinə gələn polis ilə Xanın tərəfdarları arasında baş verən qarşıdurmada 8 polis yaralanıb.

Busaat.az xəbər verir ki, ötən gün Pakistanın keçmiş baş naziri və Pakistan Ədalət Hərəkatı Partiyasının sədri İmran Xanın həbsinə iki order verildikdən sonra Xanın tərəfdarları küçələrə axışıb.

Xanı həbs etmək üçün bu gün yerli vaxtla saat 14:00 radələrində onun Lahordakı evinə gələn polislə nümayişçilər arasında toqquşma baş verib.

Polis onlara daş atan qəzəbli kütləni dağıtmaq üçün təzyiqli su və gözyaşardıcı qazdan istifadə edib.

Qarşıdurma zamanı azı 8 polis əməkdaşı yaralanıb, çox sayda nümayişçi saxlanılıb.