Raketin Rusiyadan buraxılması ehtimalı azdır - Bayden
“Əldə olunan ilk məlumat onu göstərir ki, Polşaya düşən raketin Rusiya tərəfindən buraxılması ehtimalı azdır”.
Busaat.az xəbər verir ki, bunu Bayden Polşa torpaqlarına raket düşməsi xəbərindən sonra deyib.
Mövzu ilə bağlı jurnalistlərə açıqlama verən Bayden hadisədə həlak olanların yaxınlarına başsağlığı verib: “Biz liderlərlə Ukrayna sərhədində, Polşa torpaqlarında baş verən partlayışın araşdırılmasında Polşaya dəstək verməyə razılaşdıq. İstintaq davam edərkən, biz birlikdə çalışacağıq və növbəti addımımızı müəyyən edəcəyik. Rusiyanın etdikləri tamamilə vicdansızlıqdır”.
Jurnalistlərdən biri, “Raketin Rusiyadan buraxıldığını söyləmək hələ tezdirmi?” – deyə, Polşaya düşən raketlə bağlı Baydenə sual ünvanlayıb. Bayden suala belə cavab verib:
“Əlimizdə olan ilk məlumatlar bunu deməyə əsas vermir. Təhqiqat tamamlanana qədər dəqiq deyə bilmərəm, lakin raketin Rusiyadan atıldığı ehtimalı az görünür”.
Qeyd edək ki, naməlum raket Polşanın Ukrayna ilə sərhədində yerləşən Prjevodov kəndinə düşüb və nəticədə 2 nəfər ölüb. Polşa Milli Təhlükəsizlik Komitəsi təcili toplanıb və “hərbi hissələrin döyüş hazırlığının artırılması” qərara alınıb.
Bir çox NATO ölkəsi hadisələrin narahatlıq doğurduğuna dair açıqlamalar verərək, hadisənin bütün aspektlərinin araşdırılması və bir çox detalların dəqiqləşdirilməsinin vacibliyini bildirib.
