Rusiya Baş nazirinin birinci müavini Andrey Belousov paytaxt Moskvada keçirilən “Made in Russia” adlı tədbirdə çıxışı zamanı Rusiya kömür sənayesindəki çətinliklərlə bağlı etiraflar edib.
Busaat.az xəbər verir ki, Rusiyanın ucuz enerji qaynaqları sayəsində böhranları sakit şəkildə aşdığını ifadə edən Belousov bildirib:
“Kömür ixracatında 50-60% endirim tətbiq edirik. Şirkətlərimiz kömürü bazar qiymətinin təxminən yarısına satmağa məcburdur. Amma yenə də qazanc əldə edirlər”.
Gübrə ixracatçılarının da oxşar vəziyyətlə üzləşdiyini izah edən Belousov, neftin barrelinə 20-30 dollar arası endirim tətbiq edildiyini də qeyd edib.
Qeyd edək ki, Avropa Birliyi sanksiyaların bir hissəsi olaraq avqust ayından Rusiyadan kömür idxalına qarşı sanksiyalar tətbiq etməyə başlayıb.
