"Serbiya ABŞ-dan lisenziya almayıb" - Vuçiç

Serbiya prezidenti Aleksandar Vuçiçin dediyinə görə, Belqrad sanksiyaya məruz qalan NIS-ə (Neftna Industrija Srbije) neft tədarükü üçün ABŞ lisenziyası almayıb və Pancevodakı neft emalı zavodunu bağlamaq prosesinə başlayacaq.

Busaat.az xəbər verir ki, Vuçiç bu barədə mətbuat konfransı zamanı vurğulayıb.

“Biz ABŞ hökumətindən Pancevodakı neft emalı zavodumuza neft tədarükünü davam etdirmək üçün lisenziya alacağımızı gözləyirdik. Biz ABŞ-dan müsbət qərar almadıq”, – deyə o, vurğulayıb.

Serbiya liderinin sözlərinə görə, dekabrın 2-də Energetika Nazirliyinin rəhbəri lisenziya almaq üçün heç bir ilkin şərtlərin olmadığı barədə NİS-ə rəsmi məlumat verəcək. Vuçiç qeyd edib ki, ölkə rəhbərliyi neft emalı zavodunun bağlanmasına icazə verib.

2025-ci ilin yanvarında ABŞ Maliyyə Nazirliyi “Qazprom Neft”i, onun baş direktoru Aleksandr Dyukovu və Serbiyanın NIS-ni sanksiyalar siyahısına əlavə edib. Bir neçə gecikmədən sonra məhdudiyyətlər oktyabrın 9-dan qüvvəyə minib.

Serbiyanın baş nazirinin müavini və maliyyə naziri Sinişa Mali noyabrın 16-da hökumətin fövqəladə iclasında Vuçiçə müraciət edərək, ölkə iqtisadiyyatına artan təzyiq və təhdidlər səbəbindən NIS-in milliləşdirilməsini nəzərdən keçirməyə çağırıb.

Yeganə