Serbiyada hökumət əleyhinə etirazlar keçirilir

Serbiyanın paytaxtı Belqradda keçən həftə törədilən iki silahlı hücumdan sonra minlərlə insan küçələrə axışıb. Müxalifətin çağırışı ilə “Serbiya zorakılığa qarşı” şüarı ilə təşkil edilən aksiyada 50 mindən çox insan iştirak edib.

Busaat.az xarici mediaya istinadən xəbər verir ki, nümayişçilər açıq havada zorakılığa təhrikin dayandırılmasını, zorakılıq xarakterli proqramların yığışdırılmasını, Serbiya Radio və Televiziyasının (RTS) rəhbərliyinin və Serbiyada hansı kanalların yayımlanacağını müəyyən edən müşahidə şurasının istefasını tələb ediblər.

Ötən həftə 17 nəfərin ölümü ilə nəticələnən kütləvi hücumlara görə daxili işlər naziri Bratislav Qasiç və Təhlükəsizlik və Kəşfiyyat İdarəsinin rəhbəri Aleksandr Vulinin məsuliyyət daşıdığına işarə edən nümayişçilər məsul nazir və yüksək səviyyəli rəhbərləri istefaya çağırıb. Belqraddan başqa Novi Sad şəhərində də “Hər şey dayanmalıdır” şüarı ilə nümayiş keçirilib.

Müxalifət tələblərin həyata keçirilməsi üçün hökumətə mayın 12-dək vaxt verib. Müxalifət nümayəndələri tələblərinin yerinə yetirilməyəcəyi təqdirdə faciənin miqyasına uyğun tədbirlərin görüləcəyini açıqlayıblar.

Busaat.az