Şimali Koreya qitələrarası ballistik raketlər atdı

Cənubi Koreya və Yaponiya Şimali Koreyanın qitələrarası ballistik raketlər (ICBM) buraxdığını bildirib.

Busaat.az xəbər verir ki, bu barədə Cənubi Koreya Baş Qərargahı məlumat yayıb.

Yaponiya Müdafiə Nazirliyi də raketin Koreya yarımadasının qərb hissəsindən buraxıldığını təsdiqləyib. Yaponiyanın Baş naziri Kişida Fumio jurnalistlərə açıqlamasında raketin Yaponiyanın əsas iqtisadi zonasına düşdüyünün təxmin edildiyini bildirib.

Kişida Yaponiya hökumətinin Şimali Koreyanın bu addımını “qəbuledilməz” adlandırdığını bildirib və “təxribatçı hərəkəti” pisləyib: “Şimali Koreyanın raket texnologiyaları sahəsindəki irəliləyişləri gözardı etmək olmaz”.

Yaponiyanın Müdafiə naziri Hamada Yasukazu Şimali Koreyanın tez-tez raket sınaqları keçirməsinə qarşı olduğunu bildirib.

Qeyd edək ki, raketin yerli vaxtla səhər saat 11:20 radələrində Yaponiyanın şimalındakı Hokkaydo bölgəsinin qərbinə düşdüyü qeyd edilib. Bölgədə seyr edən dəniz və hava nəqliyyat vasitələrinə ziyan dəymədiyi bildirilib. Yaponiya İctimai Televiziyası Pxenyan rəhbərliyinin bu il 34-cü raket sınağını həyata keçirdiyini açıqlayıb.