Slovakiya Ukraynaya 30 ədəd “T-72” tankı göndərməyə hazırdır, bir şərtlə ki, qarşılığında Qərb tankları da ala bilsin.
Busaat.az xəbər verir ki, bunu Slovakiyanın Müdafiə naziri Yaroslav Nad deyib.
O qeyd edib ki, Almaniya ötən il Slovakiyaya 15 “Leopard 2” tankı tədarük etməyə razılaşdıqdan sonra Slovakiya Sovet dövründən qalma 30 ədəd “BVP-1” piyada döyüş maşını Ukraynaya göndərib.
“Bizim hələ də 30 “T-72” tankımız var və əvəzində Qərb tanklarını – “Leopard”ları və ya hər hansı digərini almaq variantı olarsa, sabah da olsa, onları dərhal Ukraynaya göndərməyə hazırıq”, – deyə Nad bildirib.
Nadın sözlərinə görə, Slovakiya NATO meyarlarına görə təxminən 43 tanka ehtiyac duyacaq və Almaniyadan 15 tank aldıqdan sonra ümumilikdə 45 tanka sahib olacaq. Onun sözlərinə görə, Bratislava artıq bir “Leopard” tankı alıb və mart ayından başlayaraq ayda iki tank alacağını gözləyir.
Slovakiya keçən il Ukraynaya səkkiz “Zuzana” haubitsa artilleriya silahı tədarük edib və pulunu Danimarka, Almaniya və Norveç ödəyəcək daha 16 silah istehsalı üzərində işləyir. Nad bildirib ki, Ukrayna hökuməti daha 11 haubitsa almaqda maraqlı olduğunu deyib və müqavilələr imzalanıb.
Qeyd edək ki, Slovakiya da Ukraynaya əsgər yetişdirməkdə kömək edir. Nazirin sözlərinə görə, ötən ilin oktyabrından bu ölkədə 200-ə yaxın Ukrayna əsgəri mexanikləşdirilmiş piyadalar üçün təlim keçib.
