Telman İsmayılov rəsmi olaraq Russoya qarşı sui-qəsddə ittiham olundu

Rusiyanın İstintaq Komitəsi azərbaycanlı biznesmen Telman İsmayılova qarşı müğənni Avraam Russonun qətlinin sifarişi ilə bağlı ittiham irəli sürüb.

Busaat.az  Rusiya mediasına istinadən xəbər verir ki, Telman İsmayılova qarşı ittiham qiyabi olaraq irəli sürülüb.

Məlumata görə, 2006-cı il avqustun 19-u Avraam Russo konsertdən evinə geri dönərkən onun avtomobili atəşə tutulub. Rusiyalı müğənni hadisə nəticəsində üç güllə yarası alıb.

Hazırda istintaq hadisənin keçmiş taksi sürücüsü Vitaliy Djura və daşınmaz əmlak agentliyinin rəhbəri Aleksey Tryasnikov tərəfindən törədildiyini hesab edir. Telman İsmayılov isə sözügedən cinayət işində və 2004-cü ildə Russonun qaçırılması işində sifarişçi olaraq çıxış edir. Bildirilir ki, bu zaman biznesmen müğənninin əsas sponsoru olub.

2016-cı ildə Rusiyanın Baş İstintaq İdarəsi Russonun qaçırılması və ona qarşı sui-qəsd təşkil edilməsi işlərini birləşdirib. 2021-ci ildə Tryasnikov, daha sonra isə Djura həbs olunub. Onlar hələ də təqsirli olmadıqlarını bildirirlər.

Xatırladaq ki, Russo bir müddət əvvəl məsələ ilə bağlı açıqlama verərək bildirib ki, 2004-cü ilin yanvarında İsmayılov öz əlaltıları ilə onu döyüb, estrada fəaliyyətini onun şərtləri əsasında davam etdirməyi tələb edib. Bundan başqa, müğənnini döydükdən sonra İsmayılovun Moskva ətrafındakı evinə aparıblar, artist bütün tələblərlə razılaşmayanadək orada saxlayıblar.

Telman İsmayılova gəldikdə isə, ona qarşı 2017-ci ilin noyabrında 2 nəfər moskvalı iş adamının qətlinin sifarişi ittihamı ilə cinayət işi başlanılıb və İnterpol xətti ilə axtarışa verilib. T.İsmayılov 2018-ci ildə Monteneqro vətəndaşlığı alıb.

O, ötən ilin oktyabrında Monteneqroda saxlanılmış, elə həmin ay Monteneqro hökumətindən siyasi sığınacaq aldıqdan sonra istintaq təcridxanasından sərbəst buraxılmışdı.