Ukrayna hava limanlarına hücum etdi - 3 rus əsgəri öldü

Ukrayna Rusiyanın Dyagilevo və Engels hərbi aerodromlarına hücum edib. Rusiya isə, Ukraynanın rabitə və enerji sistemlərini hədəfə alıb.

Busaat.az xəbər verir ki, bu barədə məlumatı Rusiya Müdafiə Nazirliyi yayıb.

“Bu səhər Kiyev administrasiyası Rusiyanın uzaqmənzilli təyyarələrini zərərsizləşdirmək üçün Ryazan vilayətindəki Dyagilevo və Engels hərbi aerodromlarına sovet istehsalı olan pilotsuz uçuş aparatları (PUA) ilə hücuma cəhd edib” – deyə, Rusiya Müdafiə Nazirliyinin bəyanatında deyilir.

Rusiya hava hücumundan müdafiə sistemlərinin İHA-lara müdaxilə etdiyi bildirilən açıqlamada, İHA hissələrinin düşərək partlaması nəticəsində 2 təyyarənin zədələndiyi bildirilib. Açıqlamada hadisə nəticəsində 3 əsgərin həyatını itirdiyi, 4 əsgərin isə yaralandığı qeyd edilib.

Bəyanatda Rusiya ordusunun Ukraynaya raket hücumu ilə bağlı məlumat da paylaşılıb: “Bu gün Ukraynanın hərbi idarəetmə sisteminə və müdafiə, rabitə və enerji elementlərinə havadan və dənizdən uzaqmənzilli yüksək dəqiqlikli silahlarla genişmiqyaslı hücum həyata keçirilib. Hücum məqsədinə nail olunub. Müəyyən edilmiş 17 element vurulub. Hücum nəticəsində Ukrayna Silahlı Qüvvələrinə məxsus qatarlarla qarşıdurmaların davam etdiyi bölgələrə silah, hərbi texnika və sursatların daşınması prosesinin qarşısı alınıb”.