“Wikipedia” fondu layihəsinin sahibi onlayn ensiklopediyanı son 12 ildə ilk dəfə yenidən dizayn edib.
Busaat.az xəbər verir ki, bu barədə Mashable məlumat verib.
Yeni dizayn “Vektor 2022” adlanır. O, məqalələrin məzmun cədvəlinin səhifənin sol tərəfinə köçürülməsi ilə materiallar arasında naviqasiyanı sürətləndirir. Yeni funksiya məzmunun geniş ekranlı monitorlarda daha yaxşı nümayişi üçün effektivdir. Bundan əlavə, dizaynerlər dil dəyişdirmə düyməsini daha görünən yerə – yuxarı sağ küncə köçürüblər.
“Wikipedia”nın yeni versiyası cəmi doqquz böyük dəyişiklikdən ibarətdir. Tərtibatçılar yenidən dizayn zamanı köhnə variantların heç birini silmədiklərini iddia ediblər.
“Vector 2022” üzərində dünyanın müxtəlif ölkələrindən 30-dan çox dizayner, proqramçı və digər peşəkarlar çalışıb. Mashable-ın məlumatına görə, bəzi dəyişikliklər tərtibatçılar üçün asan olmayıb və qrupda qızğın mübahisələrə səbəb olub.
Onlayn ensiklopediyanın 314 dil versiyasında artıq tam və ya qismən interfeys dəyişikliyi baş verib.
