ABŞ niyə Ermənistana təzyiq GÖSTƏRMİR? - ŞƏRH

“ABŞ Ermənistana təzyiq göstərərsə, Paşinyan hökumətinə təhdid yarana biləcəyini düşünür”.

Bunu Ermənistanın martın 5-i Qarabağda törətdiyi təxribatdan sonra Cənubi Qafqazda sülh çağırışları edən ABŞ-ın susqun dayanmasına münasibət bildirən politoloq Samir Hümbətov Busaat.az-a açıqlamasında deyib.

O bildirib ki, ABŞ-ın ermənilərə törətdiyi təxribatlara görə təzyiq göstərməməsi bölgədə möhkəmlənmək istəyindən meydana gəlir:

“ABŞ indiki məqamda erməniləri qıcıqlandırmaq istəmir. Rusiyadan qopub Qərbə yönəlmək istəyən Ermənistanı yalnız bu formada ələ ala bilər. Gələcəkdə sülh prosesləri və danışıqlar zamanı bəlkə ABŞ-ın Ermənistana təzyiqini görərik. Lakin indiki məqamda ABŞ-dan bunu gözləmək qeyri-mümkündür. ABŞ Ermənistana təzyiq göstərərsə, Paşinyan hökumətinə təhdid yarana biləcəyini düşünür. Qərbin dəstəyi ilə hakimiyyətə gələn Paşinyanın hökumətinin iqtidarda qalmasına maraqlı tərəf məhz ABŞ-dır”.

“Hələki ABŞ Ermənistanın törətdiklərinə göz yummağa çalışır. Sülh danışıqları normal məcrada davam edəcəksə, ABŞ Ermənistana “bu məsələlərdə təmkinli ol, Azərbaycanla danışıqlarda normal iştirak et, təxribatlardan yayın” kimi mesajlar verə bilər”, – politoloq əlavə edib.

Ələsgər / Busaat.az