“Azərbaycan Avropa İttifaqı üçün önəmli tərəfdaşdır”

“Son səfərlərdə, o cümlədən prezident Mişelin səfərində vurğulandığı kimi, Azərbaycan Avropa İttifaqı üçün önəmli tərəfdaşdır. Biz iqtisadiyyat, innovasiyalar, ticarət, enerji, investisiyalar, infrastruktur və əməkdaşlıq kimi mühüm sahələrdə güclü tərəfdaşlıq şəraitində birlikdə işləməyə hazırıq”. 

Busaat.az  xəbər verir ki, bunu Avropa İttifaqının ölkəmizdəki nümayəndəliyinə yeni təyin olunmuş rəhbəri Petr Mixalko Azərbaycan Prezidenti İlham Əliyevin qəbulunda olarkən deyib.

Petr Mixalko bildirib ki, Avropa İttifaqının Azərbaycanda fövqəladə və səlahiyyətli səfiri təyin olunmağı ilə bağlı etimadnaməni təqdim etməkdən şərəf hissi duyur: “Avropa İttifaqı ilə Azərbaycan arasında yeni hərtərəfli Sazişin imzalanması bizim əsas prioritetimiz olacaqdır. Biz əminik ki, bu, nəinki bizim ikitərəfli əməkdaşlığımızın genişləndirilməsinə kömək edəcək, eyni zamanda, Azərbaycan iqtisadiyyatının daha da güclənməsinə xidmət edərək onun çiçəklənməsi və şaxələnməsini artıracaq”.