Azərbaycan - Qırğız İnkişaf Fondu və Türk Ticarət Mərkəzi arasında görüş keçirildi

Azərbaycan – Qırğız İnkişaf Fondunun Qırğızıstan tərəfi üzrə həmsədri Zamirbek Osmonov, Türk Ticarət Mərkəzinin Qurucusu Yılmaz Okuklu və Türk Ticarət Mərkəzinin İdarə Heyətinin üzvü Rafiq Qarayev arasında görüş baş tutub.

Busaat.az bildirir ki, Qırğızıstanda keçirilən görüşdə Türk dünyası ölkələri arasında ticarət əlaqələrinin genişləndirilməsi, investisiya imkanları və birgə layihələr ətrafında fikir mübadiləsi aparılıb.

Görüş Azərbaycanla Qırğızıstan arasında iqtisadi əməkdaşlığın daha da möhkəmləndirilməsinə yönəlmiş qarşılıqlı xoş niyyətin və ortaq iradənin ifadəsi baxımından mühüm əhəmiyyət daşıyır.

Görüşün sonunda Azərbaycan – Qırğız əməkdaşlığına verdiyi töhfələrə və iki ölkə arasında iqtisadi əlaqələrin inkişafına göstərdiyi dəstəyə görə Zamirbek Osmonova Türk Ticarət Mərkəzinin Qurucusu Yılmaz Okuklu və İdarə Heyətinin üzvü Rafiq Qarayev tərəfindən plaket təqdim olunub.

Qeyd edək ki, Türk Ticarət Mərkəzi Türk dünyası ölkələri arasında davamlı ticarət və investisiya körpülərinin qurulmasına yönəlmiş fəaliyyətini ardıcıl şəkildə davam etdirir.