Ərdoğan sentyabrda Putinlə taxıl müqaviləsini müzakirə etmək üçün görüşə hazırlaşır

Türkiyə prezidenti Rəcəb Tayyib Ərdoğan sentyabr ayında rusiyalı həmkarı Vladimir Putinlə taxıl sazişini müzakirə etmək üçün görüşməyə ümid edir.

Busaat.az xəbər verir ki, bu barədə Anadolu xəbər agentliyi məlumat yayıb.

“Sentyabrda Hindistanda İyirmilik Qrupunun görüşü və Birləşmiş Ştatlarda Birləşmiş Millətlər Təşkilatının Baş Assambleyasının sessiyası keçiriləcək. Əgər bu gərgin iş qrafikində imkan tapsaq, cənab Putinlə təkbətək söhbət edəcəyik. Məqsədimiz Rusiyanın taxıl müqaviləsinə müsbət münasibət bəsləməsidirXarici işlər nazirimiz yaxın vaxtlarda Rusiyaya səfər edə bilər”, – Ərdoğan jurnalistlərə bildirib.

Türkiyə liderinin sözlərinə görə, Putinlə telefonla müzakirə etdiyi mövzular arasında taxıl sövdələşməsi də var. O, bildirib ki, qapalı görüşlər zamanı bunu müzakirə etmək vacibdir. Onun fikrincə, bu yolla nəticə əldə etmək daha effektivdir.

Moskva ilə Kiyev arasında sülh danışıqlarının Türkiyənin vasitəçiliyi ilə baş tutması ehtimalına gəlincə, Ərdoğan qeyd edib ki, o, bunu istəyir və bunun baş tutması üçün səy göstərir.