İranın Xarici İşlər Nazirliyi Böyük Britaniyanın İranın gəmi hücumunda iştirakı ehtimalına dair ittihamlarını əsassız adlandırıb.
Busaat.az “Mehr” agentliyinə istinadən xəbər verir ki, İran XİN Britaniyanın xarici işlər naziri Dominik Raabın İranın Oman sahillərində gəmiyə hücumda iştirakı ilə bağlı ittihamlarını təxribat və əsassız qiymətləndirib. İran XİN-in rəsmi nümayəndəsi Səid Xətibzadənin iddiasına görə, britaniyalı nazir heç bir sübut gətirmədən amerikalı həmkarı ilə razılaşdırılmış fəaliyyətlər çərçivəsində bu bəyanatı yayıb.
“Çox təəssüf ki, bu ölkələr (ABŞ və Böyük Britaniya – red.) Qırmızı dəniz və beynəlxalq sularda İranın ticarət gəmilərinə qarşı terror hücumları və təxribat hallarında susdular, lakin İrana qarşı yalan, siyasi qərəzli ittihamlar irəli sürdülər”, -deyə Xətibzadə əlavə edib.
Qeyd edək ki, Yaponiya şirkətinə məxsus “Mercer Street” tankeri Ərəbistan dənizində hücuma məruz qalıb. Şirkətin London nümayəndəliyi “Zodiac Maritime” quldurların hücumu kimi güman edilən bu insidenti təsdiqləyib. Britaniya isə öz növbəsində “Mercer Street”lə bağlı insidentə görə İrana cavabın hazırlandığını bəyan edib.
