Meksikada bara bombalı hücum: Çoxlu ölü və yaralı var

Meksikanın Quanaxuato əyalətinin Celaya şəhərində El Estadio adlı bara bombalı və silahlı hücum təşkil edilib. Hücum nəticəsində 9 nəfər ölüb, 10 nəfər yaralanıb.

Busaat.az xarici mediaya istinadən xəbər verir ki, hadisə şahidlərinin dediyinə görə, barda olan bir çox insan yüksək musiqidən atəş səslərini eşitməyib və hücumu gec görüblər. Hücumda özlərini qorumağa çalışan bir neçə nəfərin gizləndikləri yerdə atılan partlayıcılar səbəbiylə yaralandığı, bəzi yaralıların isə ölü kimi davranaraq sağ qaldığı bildirilib.

Hadisədən sonra əyalət polisi və Milli Qvardiya bölgəyə göndərilib, hücum edənlər isə təhlükəsizlik qüvvələri gələnə qədər hadisə yerindən qaçıblar.

Hücum edənlərin tutulması üçün əməliyyata başlanıldığı bildirilib.