Moskvada tikilməkdə olan binaya hava hücumu oldu

Rusiyanın paytaxtı Moskvada tikilməkdə olan binaya hava hücumu olub.

Busaat.az TASS-a istinadən xəbər verir ki, bu barədə Rusiya Müdafiə Nazirliyi məlumat yayıb.

Bildirilib ki, hücum zamanı itki olmasa da, bunun kim tərəfindən həyata keçirildiyi hələlik məlum deyil.

Rusiya rəsmiləri hadisəni Kiyev rejiminin terror aktı təşkil etmək üçün yeni cəhdi kimi qiymətləndirib.

Ukrayna ümumiyyətlə, Rusiya torpaqlarına hücumların arxasında kimin dayandığını şərh etmir.

Çərşənbə günü səhər saatlarında Moskva hava limanlarına bütün uçuşlar dayandırılıb.

AFP xəbər agentliyinin verdiyi məlumata görə, bu, Rusiyanın paytaxtı regionuna ardıcıl altıncı hava hücumudur.

Rusiya Müdafiə Nazirliyi “Moskva Siti” kompleksində tikilməkdə olan binaya çırpılan pilotsuz təyyarənin elektron silahla yatırıldığını bildirib.

Qeyd olunub ki, təyyarə idarəetməni itirərək binaya çırpılıb.

ABŞ Dövlət Departamenti pilotsuz təyyarələrin vurulması ilə bağlı xəbərlərə cavab olaraq bildirib ki, Vaşinqton Rusiyaya pilotsuz təyyarələrin zərbələrini təşviq etmir.