Müharibə bitməmiş Ukrayna NATO-ya üzv ola bilməz

Litva prezidenti Gitanas Nauseda İtaliyanın “La Repubblica” qəzetinə Rusiya-Ukrayna müharibəsi ilə bağlı danışıb.

Busaat.az xəbər verir ki, müharibə bitmədən Ukraynanın NATO-ya üzv ola bilməyəcəyini müdafiə edən Gitanas Nauseda deyib:

“Çox çətin olar. Biz bunun fərqindəyik və ukraynalılar da bunu bilirlər. Biz praktiki mərhələyə keçməliyik, mərhələləri müəyyənləşdirməliyik və hər şeyi müəyyən etməliyik. Münaqişə bitəndə necə davranacağımıza dair düsturlar beləcə formalaşmalıdır”.

Nauseda NATO-nun iyulda Vilnüsdə keçiriləcək Sammitinin “Ukraynanın üzvlük üçün yol xəritəsini təmin edəcəyinə” ümid etdiyini bildirib.

“Düzünü desəm, bu, Vilnüsdə ən çətin məqam olacaq. Litva iddialı gündəmdə israrlıdır, lakin bəzi ölkələr hələ də bu məsələ ilə bağlı tərəddüd edirlər”, – Nauseda qeyd edib.

NATO-nun köhnə “açıq qapı” düsturunu aşması lazım olduğunu bildirən Nausseda əlavə edib: “Biz bilirik ki, NATO-nun qapıları hamıya açıqdır, lakin onlardan istifadə etmək üçün praktiki alqoritmlərimiz yoxdur, ona görə də Ukraynanın “açıq qapı” formuluna qəbul edildiyinə dair siqnallar göndərməliyik”.

Busaat.az