NATO Rumıniyaya Rusiya əleyhinə AWACS təyyarə sistemləri yerləşdirəcək
NATO Rusiyanın hərbi fəaliyyətini izləmək üçün yanvarın 17-də Almaniyadan Rumıniyaya AWACS uzaqmənzilli aşkarlama təyyarələrini köçürəcək.
Busaat.az xəbər verir ki, bu barədə alyansın yaydığı bəyanatda deyilir.
Bəyanata görə, NATO Buxarestdə AWACS hava sistemlərini yerləşdirəcək. Təyyarələrin 2023-cü il yanvarın 17-də gəlməsi planlaşdırılıb. Bu addım alyansın regiondakı mövcudluğunu artıracaq, eləcə də Rusiyanın hərbi fəaliyyətinin monitorinqini təmin edəcək.
NATO hava sistemlərinin köçürülməsini Rusiyanın Ukraynadakı xüsusi əməliyyatı ilə əlaqələndirib: “NATO-nun alyans ərazisinin hər qarışını müdafiə etmək əzminə heç bir şübhə olmamalıdır”.
Missiya bir neçə həftə üçün nəzərdə tutulub.
