Polşanın xarici işlər naziri Zbiqnev Rau Almaniyanı ölkəsinin daxili işlərinə qarışmaq cəhdində ittiham edib.
Busaat.az-ın məlumatına görə, nazir bu barədə özünün sosaial media hesabında yazıb.
Belə ki, Almaniya kansleri Olaf Şolz Varşava administrasiyasının Polşanın Afrika və Asiyadakı konsulluqlarında qeyri-qanuni viza verilməsi ilə bağlı iddialara aydınlıq gətirməli olduğunu deyib.
Yazısında Almaniyanı tənqid edən Rau Şolzun bəyanatının dövlətlərin suveren bərabərliyi prinsipini pozduğunu bildirib.
“Almaniya kanslerinin səlahiyyətinin Polşada davam edən proseslərlə əlaqəli olmadığı aydındır. Bu mənada verilən açıqlamalar Polşanın daxili işlərinə müdaxilə cəhdinə və ölkədə davam edən seçki kampaniyasına işarə edir”, – Rau yazıb.
Almaniyanın yaxşı münasibətlər üçün Polşanın suverenliyinə hörmət etməsi lazım olduğunu vurğulayan Rau, “Almaniya kanslerini ikitərəfli əlaqələrimizə zərər verəcək açıqlamalardan qaçmağa dəvət edirəm”, – qeyd edib.
Xatırladaq ki, sentyabrın 15-də Polşada giriş vizalarının verilməsində qanun pozuntuları ilə bağlı iddialar gündəmə gəlib və xarici işlər nazirinin müavini Piotr Vavrşik vəzifəsindən uzaqlaşdırılıb.
Polşa Xarici İşlər Nazirliyi ölkənin bütün konsulluq nümayəndəliklərində xüsusi yoxlamaların aparılacağını açıqlayıb.
