Quru sərhədləri gələn il açılacaq? - MÜHÜM AÇIQLAMA

“Quru sərhədlərin bağlı olması təbii ki, pandemiya ilə bağlı idi. Daha sonra qonşuluğumuzda baş verən müharibələr – Ukrayna–Rusiya müharibəsi, İsrail və İran arasında qarşıdurma kimi hallar regionda kifayət qədər ciddi vəziyyət yaratdı. Eyni zamanda Ermənistanla da müəyyən gərginlik var idi, müharibə bitsə də, öz separatçı mövqelərindən əl çəkməmişdilər. Ona görə də ölkəmizin təhlükəsizliyi üçün quru sərhədlər bağlanıb”.

Bunu Ajans.az-a açıqlamasında sabiq deputat Fəzail Ağamalı deyib. O bildirib ki, 2026-cı ildə nə olacağına birmənalı cavab vermək çətindir:

“Ukraynada müharibə uzanır. İran–İsrail münasibətləri də gərgin olaraq qalır. Sadəcə fasilədir, İsrail öz təhlükəsizliyini təmin etmək için İran rejimi ilə haqq-hesabı həll etmək niyyətindən əl çəkməyib.

Belə vəziyyətdə quru sərhədlərin açılması məqsədəuyğun deyil. Bu qarşıdurmalar dövlətimizin təhlükəsizliyi üçün problemlər yarada bilər”.