Yanacaq partlaması nəticəsində yanıq xəsarətləri alan ümumilikdə 23 mülki şəxs tibbi yardım üçün Rusiya sülhməramlılarına müraciət edib.
Busaat.az TASS-a istinadən xəbər verir ki, bu barədə Rusiya sülhməramlı kontingentinin tibbi qrupunun rəhbəri Pavel Suslov deyib.
Rusiya Müdafiə Nazirliyinin məlumatına görə, komandanın həkimləri Xankəndi-Əsgəran yolu yaxınlığında baş verən yanacaq partlayışından sonra müraciət edən Qarabağ sakinlərinə təcili tibbi yardım göstəriblər.
“Hadisədən indiyədək yuxarı tənəffüs yollarının, yuxarı və aşağı ətraflarının yanıq xəsarətləri alan ümumilikdə 23 sakin həkim briqadasına müraciət edib. Xəsarət alanların hər birinə bütün lazımi tibbi yardım göstərilib: zədələrin ilkin cərrahi müalicəsi, anestezik və ya reanimasiya yardımı. Hazırda sonrakı müalicə taktikası müəyyənləşdirilir”, – deyə Suslov bildirib.
Sülhməramlı kontingentin obyektlərində müasir tibbi avadanlıqla təchiz olunmuş modul tipli düşərgə yerləşdirilib. Bu, hər gün 80 rentgen, ultrasəs və ya flüoroqrafiya müayinəsi aparmağa imkan verir. Bura həmçinin cərrahiyyə üçün də istifadə edilə bilən sarğı bölməsi və reanimasiya modulu daxildir.
Müdafiə Nazirliyindən verilən məlumata görə, həkim briqadasına müxtəlif ixtisaslar üzrə həkimlər, o cümlədən hərbi cərrahlar, anestezioloqlar, terapevtlər, epidemioloqlar və psixoloqlar daxildir.
