Rusiyanın Ottavadakı səfirliyi “Qalisiya” SS diviziyasında xidmət edən ukraynalı nasistin meydana çıxması ilə bağlı Kanada Xarici İşlər Nazirliyinə və ölkənin baş naziri Castin Trüdonun ofisinə nota göndərəcək.
Busaat.az xəbər verir ki, bu barədə TASS-a Ottavadakı səfir Oleq Stepanov bildirib.
“Səfirlik Kanada Xarici İşlər Nazirliyinə və Baş Nazirin ofisinə nota göndərərək izahat tələb edir. “Qalisiya” SS beynəlxalq hüququn ayrılmaz hissəsi olan Nürnberq Tribunalının qərarları ilə cinayət təşkilatı kimi tanınır. Kanadanın Nazirlər Kabineti və parlament üzvləri bu kriminal cəmiyyətin üzvünü şərəfləndirməklə təkcə mənəvi deyil, həm də hüquqi normaları pozublar”, – diplomat deyib.
Daha əvvəl Associated Press Ukrayna prezidenti Volodimir Zelenskinin sentyabrın 22-də Kanada parlamentindəki çıxışı zamanı iştirak edənlərin “Qalisiya” SS diviziyası kimi tanınan 1-ci Ukrayna diviziyasında xidmət edən 98 yaşlı ukraynalı millətçini qarşıladığını göstərən fotoşəkillər yayımlamışdı.
