Rusiya Ukraynanın Yakovlevka qəsəbəsini işğal etdi

Ukraynanın Donetsk vilayətindəki Yakovlevka qəsəbəsinin Rusiya hərbçiləri tərəfindən nəzarətə götürüldüyünü bildirilib.

Busaat.az xəbər verir ki, bu barədə məlumatı Rusiya Müdafiə Nazirliyi yayıb.

Rusiya Müdafiə Nazirliyinin mətbuat katibi İqor Konaşenkov paytaxt Moskvada Rusiya-Ukrayna müharibəsi ilə bağlı açıqlamalar verib.

Ukraynada qarşıdurmaların davam etdiyini bildirən Konaşenkov, “Rusiya qüvvələrinin Donetsk istiqamətində irəliləməsi nəticəsində Donetsk Xalq Respublikasının Yakovlevka qəsəbəsi nəzarət altına alındı” – deyə, işğalı legitimləşdirib.

Konaşenkov davam edib: “Bu günə qədər Ukraynaya aid 344 təyyarə, 184 helikopter, 2 min 676 pilotsuz uçuş aparatı, 398 hava hücumundan müdafiə raket sistemi, 7 min 149 tank və zirehli texnika, 931 çoxbarelli reaktiv yaylım atəşi sistemi, 3 min 691 haubitsa və minaatan, 7 min 650 xüsusi hərbi avtomobil məhv edilib”.

Rusiyanın Belqorod vilayətinin qubernatoru Vyaçeslav Qladkov isə, sosial media hesabından verdiyi açıqlamada Ukrayna ordusunun Belqorod şəhərinə hücum etdiyini bildirib.

Hücum zamanı Rusiya hava hücumundan müdafiə sisteminin işə salındığını bildirən Qladkov hücum nəticəsində şəhərdəki toyuq fabrikinin zədələndiyini qeyd edib.

Qladkov hücumda 1 nəfərin öldüyünü, 8 nəfərin yaralandığını bildirib.

Busaat.az