“İstənilən halda nəzərə almaq lazımdır ki, Türkiyədə Azərbaycanla qardaşlıq münasibətlərinə verilən qiymət dövlət siyasətinin əsas elementlərindən və atributlarından biri hesab edilir”.
Bunu Türkiyədə keçiriləcək prezident seçkilərinin Azərbaycanla olan müasibətlərə necə təsir edəcəyindən danışan politoloq Tural İsmayılov Busaat.az-a açıqlamasında deyib.
O bildirib ki, Türkiyədə baş verən proseslər Rəcəb Tayyib Ərdoğanın rəhbərliyi altında AKP-MHP ittifaqının nəvbəti dəfə iqtidarda qalması ilə nəticələnəcək:
“İstənilən halda Türkiyə müxalifəti daxilində yekdilliyin olmaması, “altılı masa” adlandırılan əsas müxalif blokun daxilindəki parçalanmalar və İYİ partiya sədri Meral Akşenerin “altılı masa”nı tərk etməsi Türkiyə müxalifətinin içərisindəki növbəti qeyri-yekdilliyin göstəricilərindən biridir. Əlaqələrin bu kontekstdə zədələnməsi nəticədə Azərbaycan ictimaiyyətində də müəyyən proqnozların verilməsinə səbəb olur”.
Türkiyədəki seçkinin nəticələrinin bu ölkənin Azərbaycana olan münasibətini dəyişib-dəyişdirməyəcəyini politoloq belə izah edib: “Növbəti seçkilərdə də AKP-MHP ittifaqının qalib gələcəyini hesab edirəm. Əlbəttə ki, Cümhur İttifaqının qalib gəlməsi Azərbaycanla olan əlaqələri daha da gücləndirəcək. İstənilən halda nəzərə almaq lazımdır ki, Türkiyədə Azərbaycanla qardaşlıq münasibətlərinə verilən qiymət dövlət siyasətinin əsas elementlərindən və atributlarından biri hesab edilir. Bu baxımdan nəticələrin necə olmasından asılı olmayaraq hesab edirəm ki, Türkiyənin Azərbaycana münasibəti və mövqeyi heç vaxt dəyişməyəcək”.
Ələsgər / Busaat.az
