Yunanıstanda güclü yağışdan sonra daşqın olub

Yunanıstanda güclü leysandan sonra daşqınlar əmələ gəlib.

Busaat.az xəbər verir ki, bu barədə ölkənin dövlət televiziyası ERT məlumat yayıb.

Bildirilib ki, Volos, Larisa, Saloniki şəhərləri və ətraf rayonlara təsir edən güclü yağış həyatı iflic hala salıb.

ERT-nin xəbərinə görə, Volosda heyvanlarını xilas etməyə çalışan 70 yaşlı fermer torpaq sürüşməsi nəticəsində dağılan divarın altına düşərək həyatını itirib.

Daşqın sularında qalan 42 yaşlı şəxs də axtarış-xilasetmə qrupları tərəfindən axtarılır.

Bölgədə daşqın nəticəsində onlarla ev və biznesə ziyan dəyib. Mülki müdafiə bölmələri mobil telefonlarına göndərdikləri mesajda sakinlərdən məcbur olmadıqca küçəyə çıxmamağı xahiş ediblər.

Yunanıstan Meteorologiya İdarəsinin məlumatlarına görə, “Daniel” adlı əlverişsiz hava şəraiti bu həftə ölkə daxilində təsirli olacaq.

İqlim Böhranı və Mülki Müdafiə Naziri Vasilis Kikilias meteorologiya departamentinin ötən həftə verdiyi xəbərdarlıqlara uyğun olaraq bütün bələdiyyələrdən daşqınlara qarşı ayıq-sayıq olmalarını xahiş etmişdi.

Nazir meşə sahələrinin yandırıldığı ərazilərdə su basma ehtimalına qarşı tədbirlərin artırılmasını istəmişdi.