Moskva Dağlıq Qarabağa humanitar yardımın sentyabrın 18-də çatdırılmasından sonra maneəsiz davam edəcəyini gözləyir.
Busaat.az xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.
“Sentyabrın 18-də Beynəlxalq Qızıl Xaç Komitəsinin səyləri və Rusiya sülhməramlı kontingentinin və Rusiya Xarici İşlər Nazirliyinin iştirakı sayəsində hər iki marşrut üzrə eyni vaxtda regiona ərzaq və dərman partiyaları çatdırılıb. Biz yerli əhalinin maraqları naminə maneəsiz və müntəzəm humanitar çatdırılmaların davam etdirilməsini gözləyirik. Ümid edirik ki, Dağlıq Qarabağda humanitar vəziyyətin tədricən yaxşılaşdırılması Bakı ilə İrəvan arasında dialoqun başlanmasına şərait yaradacaq”, – o deyib.
“Rusiya ümid edir ki, Ermənistan-Azərbaycan münasibətlərinin normallaşdırılmasına dair bütün üçtərəfli sazişlər paketinin həyata keçirilməsi üzrə işlər bərpa olunacaq. Biz Cənubi Qafqazda sülhün və sabitliyin qorunmasında maraqlıyıq”, – Zaxarova vurğulayıb.
