ABŞ müdafiə naziri Ostin Bərzani ilə görüşüb

ABŞ müdafiə naziri Lloyd Ostin İraq Kürd Regional Rəhbərliyinin (KRG) prezidenti Neçirvan Bərzani ilə görüşüb.

Busaat.az xəbər verir ki, ABŞ müdafiə naziri Lloyd Ostin İraqın paytaxtı Bağdad səfərindən sonra İraq Kürd Regional Rəhbərliyinin (KRG) paytaxtı Ərbilə gəlib.

Ostin səfəri çərçivəsində KRG prezidenti Neçirvan Bərzani ilə görüşüb. İranın İraq ərazisini hədəf alan hücumlarını pisləyən Ostin Bağdad və Ərbil hökumətlərini əməkdaşlığa dəvət edib.

ABŞ əsgərlərinin İraqda qalmasının yeganə məqsədinin terror təşkilatı İŞİD-i məhv etmək olduğunu vurğulayan Austin deyib: “10 ildən çox birlikdə çalışdıq. Koalisiya qüvvələri sayəsində böyük bir ərazini İŞİD-dən geri ala bildik. Peşmərgə qüvvələri İŞİD-ə qarşı mübarizədə böyük rol oynayıb”.

Ostin ölkəsinin peşmərgə qüvvələrinə dəstəyinin davam edəcəyini ifadə edərək, İŞİD terror təşkilatının hələ də təhlükəli və təhdidedici element olduğunu qeyd edib.

Bərzani isə ABŞ-nin peşmərgə qüvvələrinə verdiyi dəstəyə görə təşəkkürünü çatdırıb və bölgənin sabitliyi üçün Ərbil və Bağdad arasındakı problemin həllinin zəruri olduğunu dilə gətirib.