Almaniya İsrailə silah satmağa davam edir

Almaniya hökuməti qismən silah ixracına qoyulan qadağadan sonra İsrailə 2,46 milyon avro dəyərində silah göndərilməsinə icazə verib.

Busaat.az xəbər verir ki, müxalifətdə olan Sol Partiyasının (Die Linke) hökumətə təqdim etdiyi parlament sualına cavabında Almaniya İqtisadi İşlər Nazirliyi hökumətin İsrailə qismən silah ixracı ilə bağlı qərarını elan etdiyi 8 avqust və sentyabrın 22-si arasında Almaniyanın müdafiə sənayesi istehsalçılarına bu ölkəyə ən azı 2,46 milyon avro dəyərində silah tədarük etməsinə icazə verildiyini qeyd edib.

Alman hökuməti bu təsdiqlərin yalnız müharibə silahları üçün deyil, digər hərbi texnika üçün olduğunu və əvvəllər təsdiqlənmiş ixracatın çox kiçik bir hissəsini təşkil etdiyini iddia edib. Avqustun 8-də kansler Fridrix Merts İsrailin Qəzza zolağında əməliyyatları artırmaq qərarından sonra İsrailə Qəzza zolağında istifadə oluna bilən silah ixracının dayandırıldığını açıqlayıb.

Berlin Alman müdafiə istehsalçılarına 2025-ci il yanvarın 1-dən avqustun 8-dək İsrailə təxminən 250 milyon avro dəyərində silah tədarük etməsinə icazə verib. Hökumət 2023-cü ildə İsrailə 327 milyon avro dəyərində silah və hərbi texnika satışını təsdiqləyib. 2023-cü ildə Almaniyanın İsrailə silah və hərbi texnika satışı 2022-ci ilə nisbətən on dəfə artıb.

Yeganə