Rusiyada sentyabrın 1-dən etibarən autizm spektr pozuntularından, Asperger və Rett sindromlarından, eləcə də daltonizmdən əziyyət çəkən şəxslərin avtomobil idarə etməsi qadağan ediləcək. Bununla yanaşı, epilepsiya, şizofreniya və digər ciddi xəstəlikləri olan şəxslərə də maşın sürmək qadağan olaraq qalır.
Bəs, Azərbaycanda səhhətində hansı problemi olanlar sürücülük edə bilməz? Qonşu ölkədəki qaydalar bizdə də tətbiq oluna bilərmi?
Ümumiyyətlə, ölkəmizdə hansı xəstəlikdən əziyyət çəkənlərə nəqliyyat vasitəsini idarə etmək qadağan edilə bilər?
Mövzu ilə bağlı News24.az-a açıqlama verən nəqliyyat eksperti Aslan Əsədov bildirib ki, Səhiyyə Nazirliyinin rəsmi internet səhifəsində bu barədə dəqiq məlumatlar mövcuddur. Onun sözlərinə görə, həmin siyahıda kimlərin sürücülük vəsiqəsi almasının qadağan edildiyi də əks olunub.
Ekspert qeyd edib ki, psixi əlilliyi, narkotik asılılığı olanlar, narkotik reabilitasiya mərkəzlərində qeydiyyatda olanlar, habelə görmə qabiliyyətində ciddi problemi olanların nəqliyyat vasitəsi idarə etməsi qanunla qadağandır: “Bu şəxslərə sürücülük vəsiqəsi almaq və nəqliyyat vasitəsini idarə etmək üçün xüsusi icazə nəzərdə tutulmur. Bununla yanaşı, qeyd etməliyəm ki, bu qaydalardan yayınma halları müşahidə olunur. Bəzi şəxslər öz sağlamlıq vəziyyətlərini gizlədərək qanuni məhdudiyyətləri aşmağa çalışırlar” – deyə ekspert vurğulayıb.
